Oruc və təqva arasındakı əlaqə

25 Mart 2024 - 14:43

Orucun vacib edildiyi Bəqərə surəsinin 183-cü ayəsində təqvalı ola biləcəyiniz (ləəlləkum təttəqun) deyilmiş və eyni zamanda orucun əsas hikməti izah edilmişdir.

Oruc tutmaq təqvanın artmasına necə səbəb ola bilər?

Bəzi hallarda Quran dini hökmlərin səbəblərini və hikmətini izah edir. Məsələn, namazın fəlsəfəsi Allahı zikr etmək, qisasın fəlsəfəsi isə ictimai təqva yaratmaqdır. “Bəqərə” surəsinin 183-cü ayəsində buyurulur: "Ey iman gətirənlər! Oruc tutmaq sizdən əvvəlki ümmətlərə vacib olduğu kimi, sizə də vacib edildi ki, bəlkə təqvalı olasınız".

Oruc insanları müxtəlif cəhətlərdən necə təqvalı edir:

1-İnsanın iki cəhəti var:

Maddi və mənəvi. Bir cəhətə çox əhəmiyyət vermək digərini zəiflədəcək. Oruc tutmaq oruc tutanın yemək, içmək və sair mübah şeylərə az diqqət yetirməsinə səbəb olur. Bu, fiziki cəhətləri zəiflədir və mənəvi cəhətləri gücləndirir.

2-Oruc insanların aclıq və susuzluğun nə olduğunu anlamağa kömək edir.

Bu da insanların qiyamət günündəki aclıq və susuzluğu xatırlamasına və o günə hazırlaşmasına səbəb olur. Bu hazırlıq, Allaha itaət, bəndəlik və ibadət etməklə günahları tərk etmək deməkdir. Bu da təqvadır.

3-Səhərdən axşama kimi aclıq və susuzluq yaşayan oruc tutan, daima əziyyət və aclıq çəkən yoxsulları düşünür.

Bu insanlara kömək etmək və Allah yolunda xərcləmək təqvanın başqa bir cəhətini göstərir.

Hər oruc insanda təqva ruhu yaratmır. Oruc, saf və təmiz duyğularla gerçək olarsa, bu təsirləri verə bilər. Bu oruc elə bir orucdur ki, insan təkcə yemək-içməkdən deyil, bütün haramlardan da çəkinir.

Hədislərdə deyildiyi kimi, oruc tutanın qulağı, gözü, saçı, yəni bütün üzvləri də oruc olmalıdır.

 

iqna.ir